बटुलेर टालाटुली
जोरेर दुईचार ढुङ्गा
उहिल्यै बनेथ्यो
हाम्रो सानो घर
लालुपातेको बोटमुनि
ठूलोपाटामा मकै छर्नुभन्दा
एकदिन अघिमात्रै
सरिएथ्यो बसाइँ
कोइरालोको रुखमुन्तिर
तिमी आफैले जन्माएका
टालाटुलीकै मनग्गे सन्तानहरु
स्वघोषित सम्बन्ध
र, जिन्दगीका उकाली-ओरालीको नक्कल
माटोकै दालभात, तरकारी
माटोकै ओछ्यान
झ्यालढोका बिनाकै
सानो घर र सानो संसार
ह्याप्पीनेश इन्डिकेटर बन्नुअघि नै हो
तिमी र म खुशी हुन जानेको
पुतली र जूनकिरीलाई
पछ्याउँदा लागेका अनेक घाउ
कसैले थाहा नपाई निको भएजस्तै
माछापुच्छ्रे हिमाल र आँधीखोलाबाहेक
अरु कसैले नबुझ्ने गरी बढेको हो स्नेह
क्यालेन्डर बदलिँदा पनि
उस्तै देखिएको मात्रै हो
तर उहिल्यै,
प्रेम दिवस गाउँ नपस्दै
हुर्किएको हो हाम्रो माया
गाउँकै धुलो-माटोमा ।